लुम्बिनी प्रदेशस्तरीय सुरक्षा गोष्ठी, २०८१ सम्पन्न
2081-09-02
2081-09-02
- पुष २, २०८१।
माननीय गृहमन्त्री रमेश लेखकज्यूको प्रमुख आतिथ्यमा नेपाल सरकार गृह मन्त्रालय र लुम्बिनी प्रदेश आन्तरिक मामिला तथा कानून मन्त्रालयद्वारा संयुक्त रूपमा आयोजित एक दिवसीय लुम्बिनी प्रदेशस्तरीय सुरक्षा गोष्ठी रूपन्देहीको भैरहवामा सम्पन्न भएको छ। उक्त गोष्ठीमा लुम्बिनी प्रदेशका मुख्यमन्त्री, लुम्बिनी प्रदेशका आन्तरिक मामिला तथा कानूनमन्त्री, प्रमुख सचिव, नेपाल प्रहरी महानिरीक्षक, सशस्र प्रहरी महानिरीक्षक, राष्ट्रिय अनुसन्धान विभागका मुख्य अनुसन्धान निर्देशक, नेपाली सेनाका रथी, गृह मन्त्रालयका सुरक्षा तथा समन्वय महाशाखा प्रमूख, लुम्बिनी प्रदेश आन्तरिक मामिला तथा कानुन मन्त्रालयका सचिव, लुम्बिनी प्रदेशका १२ वटै जिल्लाका प्रमुख जिल्ला अधिकारी, प्रदेश सुरक्षा निकायका प्रमुख तथा पदाधिकारी, जिल्ला सुरक्षा समितिका पदाधिकारी लगायतको सहभागिता रहेको थियो। उक्त अवसरमा गृहमन्त्रीज्यूले गोष्ठी परिणाममूखी हुनुपर्नेमा जोड दिँदै गोष्ठीबाट प्रदेशको शान्ति सुरक्षाको स्थिति विश्लेषण गरेर प्रत्येक जिल्लामा शान्ति सुरक्षामा देखा परेका चुनौतीहरू र ती चुनौतीहरूलाई सम्बोधन गर्दै प्रदेशमा शान्ति सुरक्षाको स्थितिलाई पूर्णरूपले सुनिश्चित गर्नुपर्ने बताउनुभयो। राजश्व चुहावट, तस्करी नियन्त्रण एवम् सीमा नाकामा हुने अपराधजन्य गतिविधि नियन्त्रणमा परिणाममुखी ढंगले देखिने गरी कार्यसम्पादन गर्न समेत उहाँले निर्देशन दिनुभयो। साथै प्रदेशमा चुनौतीको रूपमा देखिएका आर्थिक अपराध, साइबर अपराध, ठगी, लागूऔषध, आत्महत्या, सवारी दुर्घटना जस्ता समस्यालाई नियन्त्रण तथा न्यूनीकरण गर्न विशेष सक्रियताका साथ कार्यसम्पादन गर्नुपर्नेमा उहाँले जोड दिनुभयो। गृहमन्त्री लेखकले शान्ति सुरक्षा नै लोकतन्त्रको पूर्व सर्त भएको उल्लेख गर्दै शान्ति सुरक्षा सुनिश्चितता भएमात्र देशमा आर्थिक विकास एवम् विकास निर्माणका काम अगाडि बढ्ने बताउनुभयो। शान्ति सुरक्षा नागरिकले प्राप्त गर्नुपर्ने पहिलो आधारभूत अधिकार भएको र संविधानको रक्षाको शर्त पनि भएको बताउँदै शान्ति सुरक्षाको सुनिश्चितताले नागरिकले आफ्नो हक अधिकारहरू निर्वाध रूपले उपभोग गर्न पाउने भएकोले यसलाई गम्भीरतापूर्वक बुझ्न जरूरी रहेको उहाँले उल्लेख गर्नुभयो।
गोष्ठीमा लुम्बिनी प्रदेश अन्तर्गत १२ वटै जिल्लाका प्रमुख जिल्ला अधिकारीहरूले आ-आफ्नो जिल्लाको विद्यमान शान्ति सुरक्षाको अवस्था, समस्या तथा चुनौती, समाधानका उपाय एवम् आगामी कार्यक्रम लगायत विविध विषयमा प्रस्तुतीकरण गर्नुभएको थियो। गोष्ठीमा लुम्बिनी प्रदेशको विद्यमान सुरक्षाको अवस्था, समस्या तथा चुनौती, अपराध नियन्त्रण, सीमा सुरक्षा र आगामी कार्यभार लगायतको विषयमा विस्तृत छलफल भएको थियो। गोष्ठीको अध्यक्षता गर्नुभएका गृह सचिव गोकर्णमणी दुवाडीज्यूले मन्तव्य सहित गोष्ठी समापन गर्नुभयो।